Endeleg klart for kick-off: Me har venta på det

11.Februar brakar det laust, då Sogn U40 held sitt aller første møte på Quality Hotel Sogndal. Har du gløymt å melde deg på? Det er ikkje for seint.

– Me har gleda oss noko enormt til dette. Håpet var å kome i gang tidlegare, men koronaen har stått litt i vegen, seier styreleiar i Sogn U40 Erlend Fardal Lunde. 

Det nyoppretta nettverket som er meint å vere ein tverrfagleg satsegruppe for unge og ambisiøse yrkesindivid held sitt aller første offisielle treff fredag 11. februar. 

SPANANDE PROGRAM

Lunde kan fortelje om eit spanande underhaldningsprogram på reportoaret.

 – Me har fått på plass ein del lokale, spanande personar frå ulike spekter i yrkeslivet. På programlista står mellom anna Trine Lerum, Egil Mundal og Aleksander Øren, som skal bidra med ulike innslag. 

Men mest av alt handlar kvelden om å verte betre kjent med gruppa, og ikkje minst for medlemmane å danne seg eit bilete av kva dei kan få ut av medlemskapen. 

Lunde presiserer at nettverket er eit tilbod som dei aller fleste unge i arbeidslivet kan dra nytte av, ikkje berre unge leiarar. 

– Det er jo noko me får veldig mange spørsmål rundt, spesielt dette med å vere leiarar. Me vil først og fremst ha med oss dei som ønskjer å vere med å utvikle Sogn vidare, uavhengig av stilling eller tittel. Det er når me klarar å rekruttere i breidda at me verkeleg kan lukkast, trur eg. 

EKSTRA MORO

I nettverket, som har 5 planlagde signaturarrangement i 2022, er det allereie 75 medlemmar. Lunde håpar dei fleste som allereie er medlem, og andre elles som er nysgjerrige på nettverket vel å melde seg inn og melde seg på kickoffet innan fristen 6. februar. Med nye lettingar i tiltak også kjenner Lunde seg trygg på at det kan verte ein ekstra triveleg kveld for dei frammøtte. 

– Det er jo sjølvsagt positivt at me ikkje treng å stenge klokka 23.00. Det hadde blitt moro uansett, men det gir oss jo ekstra moglegheiter og litt mindre ting å passe på når det ikkje er like strenge rammer som tidlegare, seier Lunde som legg ved at det likevel vil verte lagt vekt på å følgje dei smittevernreglane som gjeld, nøye. 

Har du ikkje meldt deg på enno? Då kan du klikke på link her.

Tekst og bilete: Ola Skram